第17章（1 / 2）

  
  老太几岁啦？
  大概六十几伐。
  精神方面还可以伐啦？要吃眼三友补丸补补脑子伐啦，记忆力勿好？这个植入竟然毫不违和。
  正常额呀。没啥毛病，侬覅看伊瞎吃八吃，身体比吾还好。
  救济协会没来领啊？
  伊不是难民。是本地人呀。
  搿伊屋里厢人呢？
  听讲有一额儿子，阿片鬼，搓麻将，钞票输光。乃么拨伊两套房子也卖脱。人也寻勿着，大概亢人家钞票，躽起来了。老太一家头只好露宿垃小区里。
  伊本来就住垃倷小区里额咯？
  是额呀。老早靠收房钿过日脚，搿两年房子涨嘞，卖脱一套，过两天没钞票嘞又卖脱一套，乃么没房子登了。天天困长阿凳，被头衣裳咯啥，堆嘞嘅，一塌糊涂。
  落雨天哪能办？
  伊拾了几块马口铁皮，搭了只棚棚。
  嘎罪过啊！伊老公呢？
  没看到过呀。阿拉小区旁边头有只小菜场，大家买菜侪要经过额呀。伊么搿搭撤伊搭撤，阿拉帮伊讲，侬勿好搿能样子，伊就讲，关侬啥事体！吾又没垃侬屋里厢撒咯。
  搿啊勿讲道理额。甲长管伐啦？
  伊又没偷物什，甲长保长就随便伊去。
  邻居苦透。
  是额呀。想想么也罪过。侬讲是伐？儿子儿子脱底棺材败家子，死人勿管，老太就搿能，拾拾垃圾，讨讨饭，过一天是一天。阿拉真额吃勿消。
  好额，情况了解了。可怜，也可恨。人家讲养儿防老，碰着搿种儿子，防不胜防！大家有啥想法，可以打电话94288。相帮出出主意。
  一首歌之后，热线电话响个不停。接线生只能挨个儿排好顺序，嘱咐他们言简意赅，说重点。
  老早人讲，慈母多败儿。搿种人就是自家造成额。养了儿子，太宠，没教育好。样样听伊额，要啥畀啥，乃么自食其果。没啥好同情额。是小区里厢额人倒霉。
  困嘞长阿凳上头么长阿凳拆脱呀，叫伊搬呀。嘎龌龊，勿讲卫生，人容易生毛病额呀。侬自作自受，覅拖牢邻居，影响人家呀，对伐？
  无家可归真是蛮作孽额。关键要寻着伊儿子。伊儿子总归到辰光要来看伊额。一看到伊儿子就通知保长，捉起来，还债或者关牢间，戒毒咯啥。勿好让伊再做吸血虫吸下去，
  没底了！
  一个男人，有手有脚，不去寻工作，好吃懒做，坐吃山空。覅面孔。伊拉娘畀伊拖死，害死。搿种不肖子孙，社会败类，要判伊刑，吃官司，送伊去劳改。要不伊改得好啊？我死也勿相信。
  伊从小就大手大脚惯了啦，香烟老酒吃了不过瘾，再吸毒、赌博，寻刺激。自家管不好自家。一眼责任心也没。再好额家底侪败光。真额是富不过三代。
  我认得伊儿子额呀，老早一道搓过麻将额。伊吃香烟要吃好额，物什要吃新鲜额，啤酒吃起来八九瓶总归要额。钞票花起来大手大脚，外头以为伊是小开，实际上也就是靠屋里厢收收房钿过日脚，也不是啥大户人家。乃么听讲混到浦东乡下头地方去了呀，勿敢来阿拉小区里了呀，亢人家十几万嘞。
  一时间，声讨老人儿子的电话络绎不绝，群情激愤，哀其不幸，怒其不争。眼看时间差不多了，小汤赶紧总结陈词：
  人额一生，有额是先苦后甜，有额是先甜后苦。侬要啊里样呢？今朝C女士讲额事体，大家蛮有共鸣额。有种人像蛀虫一样，对伊身边额人来讲，是一种消耗。怪勿得邻居叫伊脱底棺材，就是吃光用光，还要问爷娘要，下趟日脚哪能过法子？搿肯定帮从小额教育、家庭、成长环境有关系。长期依赖爷娘，自家勿肯独立，长大了，心智也停留垃小辰光，碰着问题，只晓得躽起来。实际上，爷娘总归要老额，做勿动了。侬哪能办？还是要有一技之长，有谋生额本事。搿位老太太，希望能够得到社会上爱心人士、慈善团体额帮助，有个安身之处，解决暂时额困难；嘞搿之前，希望侬讲讲公德心，搞好卫生，覅影响大家额生活。希望大家覅当一桩故事听听就算了，多留意一下身边有困难额人，力所能及额事体，能帮就帮，现在国难当头，大家共度难关吧。 ↑返回顶部↑